Findet Nemo, händs am Eurovision Contest dänkt,
und däm nonbinäre Huen, dä Titel grad no gschänkt,
musikalisch und chli schräg, ja das hät prima funktioniert,
und au das nonbinäre, hät üs ziemlich inspiriert.
Jetzt isch dä Namä Spitzbuebe ja, als männlich z definiere,
debii wänd mir nöchst Fasnacht au, als nonbinär brilliere,
nonbinär bedütet schliesslich, weder Sack noch Titte,
drum heisset mir neu Süssgebäck, mit Marmelade in der Mitte.

Chat GTP, die künstlich Intelligänz händ mir jetzt gfragt,
doch statt ere Antwort, häts üs leider s'Natel grad verjagt,
die Frag die isch en Fähler gsi, und zwar en ziemli bösä,
sie söll doch bitte s Verkehrsproblem, im Städtli z Uznä lösä.

Dä Hueber Beck dä isch jetzt gschicht, dä Fredy tuet nöm bachä,
und sit d'Mägi nöm im Ladä staht, händ au die Gipfel nüt me z lachä,
das Versli wird jetzt gstoppt, sust lupfts am Mike dänn no dä Huet,
will mir nüt Aständigs gfunde händ, wo sich uf Wick reime tuet.

Dä Zuckerkonsum dä isch z höch, s chunt nöd vo ungefähr,
was süess isch das mach dick, aber s verzichte fallt eim schwer,
mer gsehts scho bidä Goofä, d Statistik springt eim grad is Gsicht,
scho jedes sächste Chind, liidet hüt a Übergwicht.
D' Rüebli sind us Marzipan, d Banane sind us Schoggi,
zum Zmittag gits nur Cornflakes, und zum trinke nur no Coci,
Zur Sicherheit tüends z Gommiswald, mer häts scho chönä ahnä,
für di feissä Schüeler grad, e doppleti Turnhallä planä.

S' Appezäller Gheimnis, hät bis hüt niemert erlickt,
Drum händ d' Züricher ihrä Böögg, als Spion det usä gschickt,
doch d' Appezäller beharret druf, dass s Gheimnis niemert kännt,
und händ dä Schneemaa z Heide schamlos, uf dä Schiterbiig verbrännt.
Nachem verbränne hät sich dä Böögg dänn, imne Spiegel mal betrachtet,
und sis neue schwarze Usgseh, als grossi Chance grad erachtet,
Hät sini siebe Sachä packt, und debii schmunzelnd d Händli griebe,
isch zrugg uf Züri, und hät sich det ime, Asylcenter iigschriebe.

Au im drittä Jahr da händ mir's nöd, in Fasnachtsfüerer gschafft,
So fühlt sich's also aah, wänn mer blöd zur Wösch us gafft,
Das Heftli wird jetzt umtauft, Drüü-Plus triffts nämlich gnauer,
En Huufe Werbig, und vom Rest wird s Volk grad au nöd schlauer.

Idä Chinderbörse det häts gwächslet, es sind jetzt neui druf,
debii hät di ehemalig Chefin gseit es gäb es Puff,
das Freudehuus isch nöd cho, was üs total frustriert,
jetzt händ mir näbedra bim Rüegg für nüt, en Whirlpool reserviert.

S' Gmeindsbudget isch gmacht, d Stüüre wärdet nömä gsänkt,
d' Moneetä wärdet grosszügig, a anderi verschänkt,
da häts paar Pöschte drunder, die hauet üs grad chli vom Hocker,
idä Gmeind da sitzt dä Cholä, ab und zue scho bizli locker.
Zweihundert-Tuusig für neui Fänster,, im Asylzentrum Haldrain,
Füfäsiebezg-Tuusig für d' Uniform, gönd an Musigverein,
Da müest doch au für üs en rächte Zuestupf mal drin liggä,
will falls das Puff dänn glich no chömt, würdet au mir gern chli go FiiiiiiJupeidii und Jupeidaa…

Im Gmeindrat häts vier Wächsel gäh, da sind mir ganz à jour,
Sit's d Schnitzelbank git, verträgets nur no ei Legislatur,
Wer flissigi Wächsel gern hät, dem empfehlet mir ä Chnellä,
im Cecil chasch dis Bier all Monet, bim'ne neue Wirt go bstelle.

Dä Ralf Schumacher hät sich goutet, das isch wohl bekannt,
statt Fraue findet er jetzt nämlich, Mannä intressant,
als Formel 1 Pilot isch's andersch gsi, das wüsset mir no guet,
det hät er gluegt das ihm au ja keine, in A**** ie fahrä tuet.

Ä Füüf G Antennä im Chileturm, da müend mir dureschnuufä,
z Ernetschwil hät s Volk scho bald, dä besti Draht zum Herrgott uufä,
dass dä Chilegänger jaa dä richtig Abüter aapeilt,
wärdet statt Hostie nämli bald scho, Swisscom Sim-Chärtli verteilt.

Bim Wahlkampf idä Staate, hät en Attentäter gwüetet,
En Schuss, und scho hät dä Trump, zum einte Ohr uus blüetet,
es Ersatzohr händs scho gfunde, und zwar es ziemli ghörigs,
es chöm vo Grossbritannie, dä König Charles heg nöchli vöörigs.

Schluss
Dä Tyson häts am Holifield bim Kampf abbissä, dä Van Gogh hät sich sälber abtrännt,
Am Donald Trump hät mers bim Wahlkampf ä wäg gschossä, bim Niki Lauda isch es dummerwiis verbrännt.
Die Type händ doch eifach nüt me wellä ghörä, sie händ das "Tschau am Ohre" halt chli z wörtlich gno,
drum wänd au mir eu jetztä nömä länger störe, und tüend au eu mit "Tschau am Ohre" jetzt verloh.

CIAO AMORE, ES TUT SO WEH…..