Spitzbuebe heisset mir, mit neue süessä Gschichtä,
Au das Jahr häts paar Sachä gäh, da chönd mir nöd verzichtä,
s’isch nie bös gmeint, mir wänd üs da mit niemertem verkrachä,
so Süessgebäck wie mir, sind schliesslich sälber nöd ganz bachä.

10 Jahr Gmeindefusion, ja das wird ghörig gfiiret,
Dezue no Gmeindshuus-iiweihig, jetzt wird grad richtig gschiiret,
Das sich bim Fäscht niemer vercheltä tuet, au da dra händs no dänkt,
Drum händs im Zält dä ganz Tag numä, seichwarms Bier usgschänkt.

D UBS schluckt d Credit-Suisse, das isch en härte Brockä,
us zwei mach eis, d Begründig die haut alli us dä Sockä,
es seg ä Notbräms gsi, dass keis Finanzunglück passiert,
will CS z Gommiswald gern hett, s neu Schwimmbad finanziert.

Jetzt chunt die neui Badi nöd, es segi z tüür drum seit s Volk nei,
Mir müend in altä Tümpel, oder halt id Badwannä dihei,
Dä neui Pool hett eh kein Inhalt gha, mer wär is leere gumpet,
Das Wasser wird jetzt nämli, in trochnä Brunnä z Riede pumpet.

Tüürig, Inflation, jetzt wänds vo jedem jede Frankä,
s Volk wird arm, und am Schluss sind d Gwünner wieder Bankä,
Für ä sicheri Investition, lueget mir jetzt gottseidank,
Am sicherschte isch eures Gäld, i üsere Schnitzelbank.

D Umfahrig z Uznach isch e chli, ä zächi Gschicht zum Chaue,
will Zugvögel das Land tüend nutze, dörf mers nöd verbaue,
dä Rammstein Sänger Lindemann, cha da drüber nur lachä,
au er hät wägem Vögle, grossi Umwäg müesse machä.

D Energie bliibt knapp, mer mües am Strom immerno sparä,
d Heizig abä Schruubä, und ohni Liecht au mal usharrä,
di Gmeindsagstelltä jammeret, mer tüeg sie z härt bestrafä,
bi 18 Grad im Büro, laht sichs dä Tag dur nöd guet schlafä.

Dä Hüppi üsä Gmeindepräsident – aaahhhaaaa
Hät bewiese, das er sich mit Management uskännt – aaahhhaaaa
Mer hegi ihn a jedere Sitzig pünktlich gseh – aaahhhaaaa
Drum hegets ihn nöm wölä, bidä SBB – aaahhhaaaa

Bim leere Schuelhuus z Gebertinge, tüend dunkli Wolke grad ufzieh,
Debii sind d Schuele im Linthgebiet, idä Medie wie no nie,
Für gueti Bildig hett mer s Huus, scho lang vermiete müesse,
Es gäbt au Intressänte, d Firma Läderach laht grüesse.

Die Gotthard Klima-Aktiviste, die mues mer zerscht verchraftä,
D Polizei vor Ort, mer hät sie grad welä verhaftä,
Doch s Abfüere, das hät mer leider grad chönä vergässe,
Bim Schmierlappä im Auto, seg dä Gübeli scho gsässe.

Bla Bla ** Bli Bli ** Blu Blu Blu, und Fugu ** Fogo ** Faga,
Sa Sa ** Si Si ** Su Su Su, und Mimi ** Meme ** Maga,
Habli ** Bubli ** Bla Bla Bla, und Tigi ** Tugu ** Taagä,
Wännd Wüsse wotsch was gheisse hät, muesch dä Reifler Marco fragä.

Mir Spitzbuebe säget tschüss, mir müend jetzt d’Kurve chratzä,
S Kässeli das isch parat, mit Dank für jede Batzä,
Än sehr wichtige Hiiwies, gäbet mir zum Schluss no gschwind,
Je spöter d Stund am Abig, desto spitzer d Buebe sind.

Zugabe
Di Grüene händ ideeä, das sind doch chlini Wadäbiisser,
Innerorts no drissg, da häsch bim Fahrä scho dä schiisser,
Doch d’ Schadäfreud wird riisieg sii, mir lachäd dänn verschmitzt,
Wänns all halbstund ä sonen grünene, ufem E-Bike blitzt.