Spitzbuebe heisset mir, und bringet süessi Gschichtä,
wänn öpperem ein Seich passiert, dänn müend mir drüber brichtä,
s’isch nie bös gmeint, mir wänd üs da mit niemertem verkrachä,
mir Spitzbuebe sind ja schliesslich sälber nöd ganz bachä.

Agrar-Initiative, kei Pestizid und nüt me sprütze,
das ganzä tuet am Bodä weder schadä dänn no nütze,
Z Gommiswald zeigt sich s Gägeteil, mir machäd da kei Faxä,
dört isch us versüchtem Bodä, schliesslich no es Gmeindshuus gwachsä.

Di berüemte 15 Minute, da träumt doch jedä mal dävo,
mit Heldetat und Wältrekord, uf Titelsiite cho,
s brucht gar nöd viel, das hät mer gmerkt, muesch gar nöd gross go gschiirä,
es langt wänn mitem Foschi gahsch, is Älpli chli go fiirä.

Als Bankdirektor hät mer’s härt, da mues mer viel go reise,
id Füdlispunte Striplokal, idä tüüfschtä zürcher Chreise,
dä Vincenz hät üs glernt wie d Cholä usgäh ohni Änd,
drum händ mir s Kässeli debii, mit dank für jedi Spänd.

En Gummitwist, e Gummipuppä, Gummibärli gnüsse,
Gummistiefel, Gummiball, und Gummischrot zum schüsse,
Gummi isch e super Sach, mir wäred hüt so froh,
hett am Vladimir sin Vater damals, au en Gummi gno.

D Gmeindratskandidate, händs für dä Wahlkampf dörfe nütze,
mer müesi s’iiheimische Gwerb, zu jeder Ziit guet unterstütze,
bim Gmeindshuusbau händs dänn dä Wäg, für uswärtigi pfluegt,
vom iiheimische Gwerb, händ leider all id Röhre gluegt.
D Fänschter vo Sri Lanka, dä Bodä chunt vo Uruguay,
dä Sanitär us Frankriich, s Dach us Polä, jesses nei,
äs Jekami vo überall, idä Villa Kunterbunt,
s fählt nurno, dass dä nöchst Gmeindspräsident vom Kongo chunt.

D Nasa hät für s nöchst Projekt, e mords Rageetä baut,
jetzt suechet sie uf dem Wäg no, en guete Astronaut,
im Wältall fählt en Gmeindrat, ja das lönd mir grad iiflüssä,
mir schickäd eu dä Gübeli, zum uf dä Mond ue schüssä.

Dä Zahner Heinz häts guet gmeint, mit Finanzsprütze an Staat,
wänns di z Kaltbrunn 10 mal blitzt, dänn häsch halt dä Salat,
dä Umwäg über Kaltbrunn, händ mir hüt no nöd verstandä,
bim Gisler z Ernetschwil, wär schliesslich au en Chaschtä gstandä.

Dä Gmeindspräsident Hüppi, immer flissig, mer häts gseh,
öb Gmeind, Kultur, Asylwesä, - er seit da göch no meh,
dä chogä Peter Nimmersatt, so wie mer ihn halt kännt,
seg jetzt no ehreamtlich, Freiheitstrychlerpräsident.

Genderneutral, Divers – oder Omnisexuell,
weder Maa no Frau zsii, das isch scho chli speziell,
wännd nömä weisch wo druf, will d WC gschlächtsneutral sii müend,
dänn dörfsch di au nöd wundere, wänns is Pissoir schiissä tüend.

Mir Spitzbuebe säged tschüss, mir müend jetzt d Kurve chratzä,
s Kässeli das isch parat, mit Dank für jede Batzä,
än sehr wichtigä Hiwiis, gäbet mir zum Schluss no gschwind,
je spöter d Stund am Abig, desto spitzer d Buebe sind.

Zugabe
D Entwicklig uf dä Wält, die macht üs allnä ziemli Chummer,
ä WM zmitzt im Winter, und z Kaltbrunn d'Fasnacht zmitzt im Summer,
au d'Fasnacht det in «Banggä», ja die git üs ziemli z «dänggä»,
will d'Gommiswalder di Einzigä sind, wo d Fähnä chönd «ufhänggä».